“လမ်း” ဆိုတာ
ရပ်နေလို့ ခရီးမပေါက်ဘူး၊
လှမ်းနေမှ ခရီးရောက်နိုင်မှာပေါ့.. ချစ်သူရယ် ။
. . . 
လူ နှစ်ယောက်
ပွင့်လင်းစွာချစ်ကြဖို့
ဘာအရည်အချင်းတွေ ရှိရမယ်” လို့
နင် ထင်ထားသလဲ … ။
တကယ်တော့
နင်နဲ့ငါက
အစကတည်းက လမ်းလွဲခဲ့ကြတာ… ။
ငါက..
စာအုပ်ကြားထဲက ထွက်လာတဲ့…. လူ၊
နင်က…
စာအုပ်တွေကြားထဲ တိုးဝင်ပျောက်ကွယ်နေချင်တဲ့ …. လူ။
တထွာတမိုက်နဲ့
ဥာဏ်မှီသလောက်သာ ချစ်စမ်းပါရစေ၊
ငါ့ ချစ်ခြင်းမှာ ဆရာကြီးဒဂုံရွှေမျှား မရှိဘူး၊
ငါ့ ချစ်ခြင်းမှာ ဆရာဖေမြင့်မပါဘူး၊
ငါ့ ချစ်ခြင်းမှာ ဒေါက်တာမတင်ဝင်းလည်း မရှိဘူး။
“လမ်း” ဆိုတာ
ရပ်နေလို့ ခရီးမပေါက်ဘူး၊
လှမ်းနေမှ ခရီးရောက်နိုင်မှာပေါ့.. ချစ်သူရယ် ။
တခါတလေ ….
စမ်းတ၀ါးဝါးလျှောက်ရမယ့်
ငါတို့ရဲ့ ပျားရည်စမ်းခရီးအတွက်
နင် မျက်စိမှိတ်ပြီး
ရှေ့ကို …
တလှမ်းလောက် တိုးကြည့်စမ်းပါ ။ ။ ။
No comments:
Post a Comment